Bambinuzzu bambinuzzu
chilla notte ca nascisti
quanto friddu c’assaggiasti!

‘A Madonna ti impassàu
San Giuseppe t’allucìu

C’era ‘na povera virginella
chi cantava lla litania.

Litania, fhammi beni
cacciaminde ‘i sti peni!
I sti peni ti nd’ajiu cacciatu
n’paradisu t’aju purtatu,
ccu lli suani e ccu ll’ canti
ccu lli tua fhilici amanti.

A ‘na seggia ‘i tanti juri
ci s’assetta lu Signuri;
a na seggia i culonna
si cci assetta la Madonna;
a na seggia i diamanti
si ci assettanu li Santi;

a na seggia i cuticchi
si ci assettano li angilicchi;
l’angilicchi piccirilli
chi jocavanu a nucilli;
ccu nucilli, ccu rosi e ccu juri
fhacimu a fhesta a nuastru Signuri.
(Dal libro «Ricordi di altri tempi» di Pietro Bonacci)